| Keterangan |
: Potrét nyaritakeun kasang tukang kahirupan kota kawadanaan di Tatar Sunda saméméh perang, waktu ménak masih kénéh kumawasa tur dipikasérab ku cacah kuricakan. Ahmad Bakri kalayan tapis ngagambarkeun kabiasaan sawatara ménak nu cruk-crek kawin ka jalma cacah, tuluy ditinggalkeun sanggeusna boga budak. Dina ieu buku, kacaturkeun hiji CA (dibaca Sé-A, singgetan tina candidaat ambtenar, calon priyayi) anu karék dibenum tur ditugaskeun di hiji kota kawadanaan. Upas anu ngaping manéhna sajeroning magang di dinya, Harja, engkéna bakal kanyahoan yén ieu Upas téh dulur sabapa jeung manéhna. Kitu deui anak téré wadana pangsiun nu rék ditikahkeun ka manéhna, sihoréng adi sabapa. Ieu roman matak pogot dibacana. Ahmad Bakri parigel pisan ngaréka carita, pagunemanana hirup tur humoris, direumbeuy ku mistéri leungitna potrét Juragan Sé-A ti kamarna. |
